السبب الوحيد الي دفعني نحمل التطبيق هو اني حاب نكون انسان اجتماعي 🙃 بالرغم من ان..

السبب الوحيد الي دفعني نحمل التطبيق هو اني حاب نكون انسان اجتماعي 🙃 بالرغم من اني نتعامل مع الأفراد فالعمل بصفة عادية الا اني ماعدتش نحب نحكي بزاف ولا نتناقش في امور كورونا ولا سياسة ولا حتى الكورونا ، اغلب الناس الاقرب ليا ماعدتش نتعامل معاهم اكثر حد 10 د اذا زاد الامر أعرف اني نستنى وقتاش يسكت ونبقى وحدي ، بصراحة عدت نكره الأفراد والمجتمع ليس الكل لكن بعض الامور لاتستحق الكلام والمناقشة فيها نلقى الناس يتفلسفو فيها على سبيل المثال الان دخلت التطبيق هذا جاتني الفكرة نحذفوا مباشرة مع العلم حذفت كامل تطبيقات التواصل الاجتماعي حتى المدة الاخيرة افتحت حساب انستقرام لكن الامر نفسو بالرغم اني ندخل ليه لكني مانحبش نحكي مع الاصدقاء، وصلت لدرجة أنه لما واحد من الاصدقاء يبعثلي رسالة نستناه حتى يغلق باش نرد عليه 🙃💔 ،بالرغم عمري 22 فقط لكني اصبحت غير إجتماعي فعلا حتى بعض المصطلحات لبعض الأمور فالحياة اليومية وليت ننساها بصفة دائمة مثلا نسيت انو البيض يمكن نقلوه 😅 وليت نعتبر في راسي انو نغلوه برك فالاخير ماعلاباليش علاش قاعد نكتب حتى لو أهتم واحد ورد ماكاش أصلا سؤال راه مجرد كلام فقط ،فالاخير اسف اني اخذت من وقتكم صاحا فطوركم برك 😅

شعورك انا كذلك نحس فيه من وقت لوقت وهذا يرجع لسبب نوع الشخصية الintrovert هي شخصية ماتحبش بزاف الهرج وكثرة الكلام وتستمد طاقتها من خلال الهوايات والامور الشخصية، بينما الشخصية الextrovert هي الشخصية الاجتماعية تاع الصح اللي تجيب طاقتها من الناس الثانية يعني الا ماقعدتش مع الناس تحس بالحزن والاكتئاب وغيرها. نحب نقولك شخصيتك جدا طبيعية ويبدو لي ان المواضيع المتنشرة لا تثير اهتمامك مثل ماقلت الكورونا ولا الامور السياسية وربما الناس اللي قراب منك ماعندكش امور مشتركة كثيرة معاهم فلما تهدر معاهم تحس طاقتك خلاصت ومع الوقت تتجنب تهدر معاهم من اصل.

مامعاناهاش انك تكرههم وانما التمارين الاجتماعية هذه تستنزف طاقة كثيرة انت لا تملكها.

وضع الكورونا طبعا ماراهوش يساعد، خاصة كل يوم نسمعو اخبار جديدة سيئة. شخصيا حذفت زوج من مواقع التواصل الاجتماعي وندخل للانستغرام لما انا نحب فقط. وايضا تجيني رغبة اني نغلق المحادثة لما نشوف الطرف الثاني يكتب ولكن (نجاهد) باش مانغلقش قبل مايرد يعني 😅

رغم ذلك نقولك ان هذا النوع من الشخصيات لازم له التواصل الاجتماعي والا يدخل في اكتئاب لأن طبيعة البشر لازمهم العيش في جماعات، لذلك نصيحتي انك تخصص وقت تكتشف فيه انت واش تحب باش يكون عندك مصدر (تشارجي) منه طاقتك باش تقدر تستخدمها مع الناس. تقدر تشوف لك جمعيات ولا قروبات في نفس الهوايات هذه ولا اذا تحب التطوع الاعمال التطوعية تفتح ابواب العلاقات وتعطيك طاقة من نفسها.

نتمنى نكون افدتك وصحكا فطورك

جيت نقلكم شكرا قالك خصك 40 ن 😅 المهم صاحا سحوركم

ماللخر يعني حتى أنا وليت هكدا بعدما كنت شخصية إجتماعية نحكي بزااااااااف وليت نقلل الهدرة و نحب نريح وحدي و ما نتناقش مع حتى واحد ديجا مينذاك يكون عندي رأي مخالف لموضوع معين مع كاش بنادم راسو يابس نسكت و نقولوا عندك الحق غير باه ما يكثرش الهدرة معايا ببساطة كلش بالنسبة ليا ولى يعيي و تافه 😁🙃🙄 تسمى أبشر راك فالطريق الصواب المبدعين قليلي الإختلاط 🙄

بطبيعة المجتمع تاعنا كنت نظن ان الناس يغلب عليها الطابع الاجتماعي. ابسط شي وانتا تستنا عند الدونتيست تجيك هاذيك لعجوزة وتحكي قصة حياتها للغريب كأنها تعرفو من سنين وعادي جدا. عموما المواضيع اللي اغلب الناس تهدر فيها كيما تقولو حش وتناقل خبار الناس أو تناقل اي كلام وتفلسيف في كل شي وهاذا الشي مزعج ويستنفذ من طاقة الفرد فعلا. نصيحتي ليك انك تكون وسط متوازن حاول تختلط شوي بالناس لان المهارات الاجتماعية تاعك لازمها تمرين وتنمية وفي نفس الوقت بعد بالقدر المعقول ما تحرقش كامل قواك الشخصية وبالنسبة للمواضيع أيضا حاول انك تختلط بناس من خلفيات منوعة وتدخل حس الفكاهة والمرح في حياتك وبعد عن أجواء الكآبة وبالتوفيق.

ان تخالط الناس وتصبر على اذاهم خير من عدم مخالطتهم