مجهول
اذا تسألي المتابعين في رايهم واش هي الوسائل المتاحة للتغيير الإيجابي في البلاد؟ ..
اذا تسألي المتابعين في رايهم واش هي الوسائل المتاحة للتغيير الإيجابي في البلاد؟ واش اقتراحاتكم لاعمال على مستوى الفرد لي ممكن تحسن من وضع البلد
صاحب نهضة سنغافورة عند تقلده الحكم خاطبهم : ليس وقت السياسة الآن ، علينا بالعمل ثم العمل . حنا نعانو من عقلية النفور من العمل تصيب اغلبنا حاب خدمة ماتعييش بشهرية مليحة ، تدخل للبيروات تصينا عيانين وكارهين ، ماعندناش اهداف وطموحات على بعد بعيد او تهدف لتغيير وتحسين محيطنا ، غير لي يحب خدمة توكلو وتلبسو مليح وخلاص . تركيا رائدة في مجال الالبسة تصيبها معمرة ورشات وناس خدامة وجادة صح ، الصين كيف ... لوكان نشطارو شوي في المجال الفلاحي ، السياحي ، الحرفي يطلع انتاجنا المحلي على الأقل ، الحكومة عليها تسهيل الاستثمار والمشاريع للمواطن وتنظيمها ، مع فرض غرامات صارمة لوضع حد للفوضى التي في الشوارع وبين الناس
ارى انه يجب الانتباه للشباب في مختلف الاعمار، مثلا من صغرهم علموهم التجارة او صنعة يزيدوها مع قرايتهم اذا حبوا بسك القراية ماشي الحل الوحيد، ديرو مراكز للشباب باسعار معقولة تعلمهم مبادئ التجارة، التسويق، الخياطة للبنات مثلا..الخ، علموهم اساسيات الحياة" التحكم في النفس عند الغضب و التعامل مع الشعور بالذنب، تحمل مسؤولية خياراتهم،...علموهم واش يسحقوا في ايامهم القادمة"، هاذ الشيء استنتجتوا من قضية الشخصين اللي قتلوا في باش جراح" لازم نتعلموا من واش رانا نسمعوا و نحاولوا نصححوا الامر و نمنعوا تكراره"، ابنوا ملاعب مليحة للشباب " خطرة قريت عبارة على جدار ، كرهنا من الزطلة ديرولنا ستاد" هذا معناه ان احد اسباب اللجوء للمخدرات هو الفراغ لذلك ابنوا مراكز مليحة فيها اشخاص محترمين و فاهمين تنشئ جيل واع و فاهم و يستغل ايام فراغه في شيء يفيده في الايام اللي ماراحش يولي عندو وقت فراغ بزااف و مسؤولياتو راح تكثر. صاحب السؤال و كل من يقرأ كلامي، اسمعوا الشباب و خاصة المراهقين و المراهقات و ابحثوا عن واش خاصهم و وفروه باسعار معقولة، هكا تكونوا حسنتوا الجزائر اليوم و الغد و اعتبروها صدقة جارية لكم و رسالة نبيلة و حاجة مليحة درتوها تقابلوا بيها ربي. الله يوفقنا و ينور لنا بصيرتنا 🤲
يد وحدة متصفق لازم تكون حكومة موثوقة و تحب تخدم انا كي نشوف نشاله مع تبون تتعدل مي لازم حنا شعب نعاونو سلطة كل واحد يدير الخير و ينظف محيطو و ينهي على منكر
العمل على ايجاد الحلول حتى و لو كانت صعبة و عدم قبول المشاكل و الصعوبات و لو كانت سهلة
التمسك بمبادئ الإسلام و السهر على تربية الأطفال هم الاساس لبناء المجتمع .... تربية الابناء تربية اسلامية عملية . غرس في أبنائنا قيم الاخلاقية مع تعليمه حرفة تكبر معه و تنفعه و تنفع المجتمع
لازم تكونوا ايجابيين.... تكونوا نحبوا الخير لبعض.. متعاونين.... و متصالحين مع انفسنا بلي الخطا يبدا من عندنا... و نتجنبوا نحملوا غيرنا المسؤولية
ماراكش مسجل معانا. تقدر تفيدو؟
تقدر تدخل بسهولة منا
Sign in with Google